Ada mpya zinatishia utalii Tanzania

Herbalist Dr MziziMkavu · 2015-05-22T23:24:07+00:00

KWA UFUPI Serikali inapaswa kupitia upya wajibu wake kwa kurahisisha mfumo wa kodi na ushuru, na kufanya mgawanyo wa mapato kuwa wazi zaidi. Sekta ya utalii kwa sasa ndiyo inaongoza katika kuiletea Tanzania fedha za kigeni na ilifika hapo baada ya dhahabu kuporomoka bei katika soko la kimataifa. Mapato yatokayo na utalii yamekuwa yakikua katika miaka ya hivi karibuni wakati yale yatokanayo na dhahabu yamekuwa yakipungua. Katika mwaka ulioishia mwezi Machi mwaka huu, mapato yatokanayo na utalii yalifika Dola za Marekani 2.1 bilioni kutoka Dola 1.9 bilioni kipindi kama hicho mwaka uliopita wakati yale ya dhahabu yalipungua kutoka Dola 1.5 bilioni hadi Dola 1.3 bilioni. Hata hivyo, ukuaji huu wa utalii unatishiwa na ada mpya ambazo serikali imetangaza kuanza kutoza hoteli zilizo ndani ya hifadhi za taifa ambazo watumiaji wake ni watalii. Ada hizo zinazotarajiwa kuanza kutozwa mwezi Julai mwaka huu, zinawataka watumiaji wa hoteli kulipa ada ya kati ya Dola za Marekani 30 na 100 kwa mtu mmoja kwa usiku moja, kwa mujibu wa Gazeti la Serikali la Machi 13, 2015. Ada hiyo ni nje kabisa na gharama za hoteli pamoja na kodi zingine. Ada hiyo ambayo itazigusa hoteli 27 zilizopo ndani ya hifadhi 15 zinazomilikiwa na Mamlaka ya Hifadhi za Taifa (Tanapa) inaelezwa na wadau wa utalii kama kikwazo kinachoinyemelea sekta ya utalii nchini na kuathiri ukuaji wake. Mkurugenzi Mtendaji wa Shirikisho la Utalii Tanzania, Richard Rugimbana anasema huenda hata malengo ya ukuaji wa asilimia 20 kwa mwaka ifikapo 2025 yasifikiwe kutokana na changamoto hiyo. Kwa sasa, utalii unakua kwa wastani wa asilimia tisa kwa mwaka. Tunashangazwa na hatua hii na sijui ilikuwaje zikachaguliwa hoteli 27 ndani ya hifadhi. Viwango vya hoteli zingine ndani ya hifadhi havijulikani, anasema Rugimbana. Kulipuka kwa ugonjwa wa ebola katika mataifa ya Afrika Magharibi kuliathiri ujio wa watalii wengi katika sehemu mbalimbali barani Afrika ikiwamo. Hii ilisababishwa na tabia ya watalii wengi kufikiri kwamba Afrika ni nchi moja badala ya ukweli kwamba bara hili lina nchi nyingi zilizo mbali kati yao. Inasemekana wasiwasi hiyo ya ebola ilipunguza ujio wa watalii nchini Tanzania kwa asilimia 30, linasema Shirikisho la Utalii nchini (TCT). Tozo hizi zinaondoa ushindani kwa kuwafanya watalii wanaoishi katika hoteli zinazolingana kulipa gharama tofauti. Tunaongeza gharama kwa watalii wakati ambao tayari watalii wamepungua. Hii itazorotesha sekta hii muhimu kwa uchumi wa Tanzania, anasema Rugimbana. Mamlaka ya Hifadhi kwa upande wake inasema tozo hiyo haibagui hoteli zilizopo kwenye hifadhi bali inalipwa na hoteli zote zilizo katika hifadhi zao. Msemaji wa Tanapa Pascal Shelutete anasema utekelezaji wa ada hizi siyo mpya kwani ulianzishwa mwaka 2008 wakati huo kukiwa na hoteli 27 katika hifadhi za taifa. Ada hiyo ilipoanzishwa mwaka 2008, hoteli 27 zilizokuwapo katika hifadhi zilienda mahakamani kupinga utekelezaji wake na mahakama ilizuia utekelezaji wake. Hata hivyo, baadaye Tanapa inasema ilishinda katika kesi hiyo na mahakama ikaruhusu iendelee na utekelezaji wake. Kwa hiyo siyo zile hoteli 27 zinazolipa ada hii bali hata zile zilizokuja baadaye. Tunahakikisha kila hoteli inafuata sharti hili ambalo huwa ni sehemu ya mikataba yao, anasema Shelutete. Wadau wa utalii wanalalamika kwamba hakuna fomula maalumu inayofahamika katika kukokotoa tozo hizo na kuzitofautisha baina ya hoteli moja na nyingine. Sisi hatukati kulipa ila tunataka kuona usawa na kama wadau tuna haki ya kujua namna ada hizi zinavyokokotolewa hadi kuwa tofauti kati ya hoteli moja na nyingine, anasema Rugimbana. Hoteli za Tanzania zinasemekana kutozwa takriban aina 50 tofauti za kodi, hali ambayo wadau wanasema ni mzigo mkubwa. Tayari sekta ya utalii ni mchangiaji mkubwa kwa uchumi wa Tanzania na inakadiriwa kuajiri Watanzania 500,000, kwa mujibu wa taarifa ya Benki ya Dunia iliyotolewa mwezi Januari mwaka huu. Toleo hilo la Hali ya Uchumi wa Tanzania linalochapishwa na Benki ya Dunia mara mbili kwa mwaka linadai kwamba sekta hii inaweza kukua na kujenga ajira nyingi zaidi, hususan katika ajira zinazolipa vizuri pia inaweza kuunganisha biashara na wana jamii wa maeneo husika. Ili kuweza kutumia fursa hii, serikali inapaswa kupitia upya wajibu wake kwa kurahisisha mfumo wa kodi na ushuru, na kufanya mgawanyo wa mapato kuwa wazi zaidi, liliandika toleo hilo. Mchango wa utalii huwakilisha takriban asilimia 3.4 ya pato ghafi la Taifa la Tanzania (GDP) lakini kiwango hiki kinaweza kufikia makadirio ya asilimia 10 unapochukulia mchango wake ambao siyo wa moja kwa moja katika sekta nyingine kama vile kilimo na uchukuzi. Kutokana na hali hii, sekta hii inachukuliwa kuwa ni ya kipaumbele chini ya ajenda ya maendeleo ya Rais Jakaya Kikwete, pia na ile ya Baraza la Taifa la Biashara. Sekta ina lengo la kuongeza mapato yatokanayo na utalii mara nane ifikapo mwaka 2025, au kuongeza kiwango cha ukuaji wa sekta maradufu kwa kila mwaka kama inavyoonekana katika miaka ya hivi karibuni. Toleo hilo la Benki ya Dunia linapendekeza mikakati ya aina tatu inayoweza kufikia matarajio na kuingiza karibu Dola za Marekani 16 bilioni kwa mwaka ifikapo mwaka 2025. Mwelekeo wa kwanza ni kupanua shughuli za utalii kuwa anuwai tofauti na msisitizo wa sasa ambao unatoa umuhimu kwa utalii wa gharama kubwa katika Kanda ya Kaskazini kuzunguka Arusha na Zanzibar ambako hadi asilimia 90 ya shughuli za utalii zinafanyika kwa wingi. Ripoti inapendekeza kuchangamkia fursa nyingine, hususan maeneo ya Kusini na kutayarisha shughuli ambazo zitawavutia watalii wenye bajeti za chini na kati, ikijumuisha watalii wa ndani na kutoka katika kanda. Mwelekeo wa pili ni kuongeza juhudi za kuwaunganisha wana jamii wa maeneo husika na wafanyabiashara wadogo wa utalii katika shughuli za utalii, kupitia michakato ya kugawana faida. Wakati tayari juhudi hizi zipo nchini Tanzania, ni kwa kiwango cha chini na hazijaleta mabadiliko katika jamii. Ripoti inazungumzia utendaji bora ambapo programu za mafunzo na kuunganisha jamii hutayarishwa kwa pamoja baina ya sekta za umma na binafsi, hii imeleta viwango vya juu vya ubora wakati huohuo ikiongeza ushiriki wa jamii ya wafanyabiashara na wafanyakazi wa maeneo hayo katika shughuli za utalii. Mwelekeo wa tatu unataka pafanyike mapitio ya mfumo wa sasa wa kodi na ushuru ambao ni mgumu kuuelewa. Mapitio hayo pia yaguse matumizi yasiyo wazi ya mapato yaliyokusanywa kutoka utalii. Ripoti ya Hali ya Uchumi inapendekeza kwamba, mfumo wa kodi na ushuru ufanywe kuwa rahisi na kutekelezwa kwa usawa zaidi kwa lengo la kupunguza gharama za uendeshaji wa biashara na kuziba mianya ambayo inatoa nafasi kufanya malipo haramu. Aidha, mgawanyo wa mapato urasimishwe ili iwe rahisi kufuatilia na kuongeza manufaa kwa wananchi walio wengi. Serikali pia lazima iongeze usimamizi wa maliasili kupitia matumizi ya busara ya motisha na vikwazo ili kulinda wanyama walio katika hatari ya kutoweka pia na matumizi bora ya ardhi na maji. Ukurasa wa Urahisi wa Kufanya Biashara umerudi katika Jarida la Uchumi, gazeti la Mwananchi kila Alhamisi. Lengo lake ni kusaidia juhudi za kuboresha mazingira ya ufanyaji wa biashara Tanzania. Kwa mrejesho tutumie ujumbe mfupi wa maneno kupitia 0786240172. Washiriki wanne, watapewa muda wa maongezi wa Sh10,000. chanzo.Ada mpya zinatishia utalii Tanzania - Makala

Thread starter Herbalist Dr MziziMkavu
Start date May 23, 2015

Herbalist Dr MziziMkavu

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

Ada mpya zinatishia utalii Tanzania

Herbalist Dr MziziMkavu

JF-Expert Member

Our Community

Regional Communities