Ccm hawautaki muungano, wanataka uvunjike!

aduwilly · 2014-04-19T10:40:45+00:00

Nimeitafakari kwa makini dhamira ya CCM kung'ang'ania serikali mbili. Nimelazimika kuamini kuwa CCM hawautaki Muungano wetu. Nina hoja tano ambazo haziwezi kujibiwa kwa kufanya maboresho katika mfumo wa serikali mbili; zinahitaji mabadiliko ya mfumo. Kwanza, kwa kuwa katika mfumo wa serikali mbili Rais wa Muungano ni Rais wa Tanganyika pia, si haki hata kidogo Rais wa Muungano atokee Zanzibar. Jambo hili linawezekana tu iwapo Tanganyika haijitambui au kama imeridhia kuamuliwa na mtu wa Zanzibar hata katika mambo yake yasiyo ya Muungano. Katika mazingira ya Tanganyika kujitambua na kutaka kujiamulia yenyewe katika mambo yasiyo ya Muungano, Zanzibar 'haitakiwi' kutoa Rais wa Muungano. Hivyo, washirika wa Muungano hawana usawa wa kudumu; Muungano wenyewe hauwezi kudumu! Pili, katika mazingira ya vyama vingi, haiwezekani kuweka 'utaratibu' wa kupokezana kiti cha urais baina ya Tanganyika na Zanzibar kama ilivyokuwa zamani wakati wa chama kimoja bila kuingilia demokrasia ndani ya vyama vya siasa. Kwa mfano, kwa kuwa CCM wanadai mfumo wa serikali mbili ni sera yao, kama wataamua kufuata utaratibu huo, wakiweka mgombea kutoka Zanzibar katika mazingira ambayo Tanganyika inataka ijiamlie yenyewe katika mambo yake yasiyo ya Muungano, Tanganyika kwa wingi wao watachagua Rais kutoka chama kingine ambacho kimeweka mgombea wa kiti hicho anayetokea Tanganyika. Ili kuepusha hali hii itabidi tulazimishe vyama vyote viache kuangalia na kuthamini wagombea wake, itabidi vyama vifuate sera ya "upendeleo". Ni aibu kujenga taifa linalofanya "demokrasia ya upendeleo". Hivyo, mfumo wa serikali mbili haufai. Hautoi fursa kwa Zanzibar kupata nafasi ya urais wa Muungano. Tatu, Zanzibar ikishajiridhisha kwamba haiwezi tena kuongoza katika serikali ya Muungano, haiwezi kushangilia. Itafadhaika, itajishika tama na kutafakari. Muungano utakuwa umegeuka fedheha kwa mshirika huyu, hawezi kuuthamini. Nne, kwenye macho ya Wazanzibari wengi, muundo wa sasa una sura ya Tanganyika kuimeza Zanzibar. Ndiyo maana, wengi wamekuwa wakiulalamikia ukilinganisha na Watanganyika. Kosa kubwa lililoumba hali hii ni Tanganyika kuvaa koti la Muungano. Kwamba kila kitu cha Tanganyika kikawa cha Muungano. Jambo hili linaondoa usawa baina ya washirika wa Muungano kwa sababu mmoja wao - Tanganyika - alipata "ukubwa" ambao mwenzake hawezi kuwa nao. "Ukubwa" huu wa Tanganyika hauwezi kufutika katika mfumo wa serikali mbili. Vita ya hadhi baina ya washirika wa Muungano haiwezi kujibiwa na maboresho ya serikali mbili. Itaendelea kuwepo na itazidi kuhatarisha usalama wa Muungano. Mwisho, kutokana na hofu iliyojengeka ya Zanzibar kumezwa na Tanganyika, haiwezekani kwenda kwenye mfumo wa serikali moja tukitokea kwenye mfumo wa serikali mbili. Kufanya hivyo, itamaanisha "Zanzibar kumezwa yote yote au jumla jumla na Tanganyika". Haitakuwa rahisi, tutaendelea kubaki katika serikali mbili zilizojaa malalamiko. Je, tuendelee kulalamikiana? Kulalamikiana kila siku ni kusindikizana katika siku ya kuvunja Muungano! Mimi ninaamini, katika hatua tuliyofikia, kama kweli tunaupenda Muungano, njia rahisi ya kufika kwenye serikali moja ni kupitia kwenye serikali tatu. Huko hakutakuwa na mazingira ya mshirika mmoja kummeza mwenzake. Ninaupenda sana Muungano lakini kwa hila hizi za CCM, hila za kuukataa ukweli wa nyakati, ninachelea kusema kuwa vizazi vyetu vinaweza kuukuta Muungano wetu umebaki kwenye vitabu vya historia tu. Mfumo wa serikali mbili hauwezi kujibu "kero" hizi za msingi zinazotikisa Muungano wetu. Wahafidhina wa CCM - watu wasiotaka chochote kibadilike katika taifa - wanang'ang'ania serikali mbili. Wanadai wanalinda Muungano. Mimi ninaona wanalinda mazingira ya kuvunja Muungano. Hawautaki, wanataka uvunjike. Wangekuwa wanataka udumu, wangechukua hatua ya kutii maoni ya wananchi kama yalivyowasilishwa na Tume ya Warioba. Kwa Muungano imara, serikali tatu haziepukiki! Mungu ibariki Zanzibar, Mungu ibariki Tanganyika, Mungu ibariki Tanzania.

Thread starter aduwilly
Start date Apr 19, 2014

aduwilly

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

Ccm hawautaki muungano, wanataka uvunjike!

aduwilly

JF-Expert Member

Our Community

Regional Communities