CCM ni waumini wa serikali tatu

Mzee wa Usafi · 2014-05-18T20:20:02+00:00

.. WAKATI mjadala mkali ukiendelea juu ya muundo unaofaa kudumisha Muungano wa Tanzania; CCM ikiwa imeshikilia muundo wa serikali mbili na Rasimu ya Pili ya katiba inayotokana na maoni ya Watanzania ikiwa inapendekeza muundo wa serikali tatu, mambo mengi na ya msingi yanaendelea kujiweka wazi: Ni kwamba pamoja na matatizo wanayoyapata wanachama wa CCM kutoa ishara ya serikali mbili, kwa maana wakionyesha vidole viwili watakuwa wanajitambulisha kwa ishara ya Chama cha Demokrasia na Maendeleo (CHADEMA) na kuishia kuonyesha kidole kimoja mkono wa kushoto na kidole kingine mkono wa kulia, kumbe watu hawa ni waumini wa muundo wa serikali tatu kwa miaka mingi. Nitalieleza hili ndani ya makala hii. Jingine lililojiweka wazi ; Ni kwamba kufikia hapa tulipo mchakato wa kutengeneza Katiba mpya, ukianzia Tume ya Jaji Warioba na siku ambazo Bunge la Katiba limefanya kazi, zimeteketea zaidi ya bilioni 100, za nchi ambayo ni masikini na inaogopa kabisa kutumia gharama kubwa kwa mambo yasiyokuwa ya msingi kama kuendesha serikali tatu zinazopendekezwa kwenye Rasimu ya Pili ya Katiba; Kwamba watu wanaoogopa gharama kuendesha serikali tatu, bado wanaendelelea kupendekeza kuongeza mikoa na wilaya. Eti wanataka Mbagala nayo iwe wilaya na mwisho wake ni mapendekezo ya Mkoa wa Dar es Salaam kutengwa katikati na kutengeneza mikoa miwili; watu wanaoogopa gharama wanaandaa bajeti ambayo ni kubwa mara mbili ya makusanyo ya serikali kwa mwaka; na kwamba kumbe wale waliopendekeza kuanzishwa kwa mchakato wa kuandika Katiba mpya hawakuwa na nia ya dhati; walitaka kutengeneza kiini macho cha kuzunguka nchi nzima kukusanya maoni ya wananchi wakati wao tayari walikuwa na mapendekezo ya mabadiliko ya katiba. Walitaka fedha nyingi ziteketee kwanza ndipo wawashawishi Watanzania kwamba kuendesha serikali tatu ni gharama kubwa! Mtu anapoleweshwa kwa propaganda na mapenzi ya chama cha siasa bila kutafakari na kufikiri, anaweza kushindwa hata kuuona ukweli ulio wazi kabisa machoni kwake. Mfumo wa uongozi wa CCM ni wa serikali tatu. Jinsi wanavyokiongoza chama chao cha siasa, hakuna tofauti na muundo wa serikali tatu zinazopendekezwa na Rasimu ya Pili ya Mabadiliko ya Katiba. Wana Mwenyekiti wa CCM, ambaye ndiye Rais wa Jamhuri ya Muungano wa Tanzania, Dk. Jakaya Kikwete. Lakini pia wana Makamu Mwenyekiti wa CCM wa Zanzibar na Makamu Mwenyekiti wa CCM Tanzania Bara. Maana yake ni kwamba Mwenyekiti wa CCM, anashughulikia mambo ya kichama ya Taifa zima. Lakini Makamu wa Mwenyekiti wa Zanzibar anaangalia mambo ya kichama ya Zanzibar, na Makamu Mwenyekiti wa Tanzania Bara anashughulikia mambo ya kichama ya Bara. Vyo vyote vile huu ni muundo wa serikali tatu! Kama CCM, ni waumini wa serikali mbili kama wanavyotaka tuamini na kukubali basi wangekuwa na Mwenyekiti na Makamu wa Mwenyekiti mmoja. Bila kulazimika kuwa na makamu wenyeviti wawili. Kwa maana kwamba Mwenyekiti akitoka Bara, basi Makamu Mwenyekiti atoke Visiwani. Huo ndio muundo wa serikali mbili. Ni wazi hadi wanafikia kuamua kuwa na Makamu Wenyeviti wawili, waliona kuwa na makamu mmoja haiwezekani. Yawezekana kabisa kwamba labda hakuna gharama zinazohitajika kuwa na Makamu Wenyeviti wawili, lakini ukweli unajionyesha wazi kwamba huo ni mfumo wa serikali tatu. Yanaweza yakatolewa maelezo mengi, maana Watanzania hatujambo kwa maneno na maelezo, lakini ukweli utabaki pale pale, kwamba ni muhimu kuwa na Mwenyekiti anayeshughulikia mambo ya CCM Visiwani na Mwenyekiti anayeshughulikia mambo ya CCM Bara, na hawa wawili wanakuwa chini ya uongozi wa Mwenyekiti wa Taifa wa CCM. Vivyo hivyo, ndivyo ilivyo muhimu kuwa na Makamu wa Rais anayeshughulikia masuala ya Zanzibar na Makamu wa Rais anayeshughulikia Masuala ya Tanganyika, na wote hawa wawili wanakuwa chini ya uongozi wa Rais wa Muungano. Ni muundo ule ule! Hata kwa upande wa Katibu Mkuu wa CCM, kuna Naibu Katibu wakuu wawili. Mmoja wa Zanzibar na mwingine wa Tanzania Bara. Kwa maana kwamba Naibu Katibu Mkuu wa Zanzibar, anashughulikia mambo ya CCM ya Visiwani na Naibu Katibu Mkuu Bara anashughulikia mambo ya CCM ya Bara. Kwa muundo wa kweli wa serikali mbili, basi angekuwepo Katibu Mkuu na Naibu Katibu Mkuu. Kama Katibu Mkuu angetoka Visiwani, basi Naibu angetoka Bara na kinyume chake. Hata Jumuiya ya Vijana wa CCM,wale wanaopinga kwa nguvu zote muundo wa serikali tatu, nao pia wana Mwenyekiti, Makamu Mwenyekiti Zanzibar na Makamu Mwenyekiti Bara. Pia wana Katibu Mkuu, na Naibu Katibu Mkuu wa Zanzibar na Bara. Ni muundo ule ule unaopendekezwa na Rasimu ya Pili ya Katiba. Rais wa Muungano na makamu wa rais Zanzibar na makamu rais Tanganyika. Na wote hawa wawili wanakuwa chini ya rais wa Muungano. Lakini wale walioleweshwa na propaganda hawauoni ukweli huu. Jambo jingine la kushangaza ni kwamba badala ya muundo huu wa utatu kuidhofisha CCM, tunaona inaendelea kudunda na kushinda kwa kishindo Bara na Visiwani. Maana yake ni kwamba muundo huu ni mzuri na unajenga umoja na mshikamano. Jambo likiamuliwa Dodoma, maamuzi mengine yote ya Bara na Visiwani yanafyata mkia. Ndiyo maana ya Serikali ya Zanzibar, Serikali ya Tanganyika, na mwenye maamuzi makubwa ni Serikali ya Muungano, ikitoa uamuzi, serikali washirika zinafyata mkia. Hivyo hoja kwamba muundo wa serikali tatu utaudhoofisha Muungano, isingekuwa inatolewa na CCM, maana kwa mtu yeyote aliye makini, mtu anayefahamu muundo wa chama hiki na uongozi wake atapata shaka kama watu hawa wa CCM watakuwa wanamaanisha kile wanachokisema. Ni mzaha. Ni kutaka kuchezea akili za Watanzania. Ni kushinikizwa na kikundi cha watu wachache wenye nia binafsi, wenye fedha nyingi kiasi cha kuubadilisha uongo kuwa ukweli. Kiasi cha kuinunua nafsi ya mtu na kumtawala mtu huyo kimwili na kiroho? Au ni shinikizo la wawekezaji kutoka mataifa ya nje ambao wana shaka kubwa na mabadiliko yoyote ya kuleta uwazi zaidi kwenye uwekezaji katika taifa letu au ni kitu gani? Hoja za msingi ambazo CCM imekuwa ikizitoa kupinga muundo wa serikali tatu ni kwamba kuziendesha serikali tatu ni gharama kubwa, nchi yetu bado ni masikini na haina uwezo kuendesha serikali tatu. Na kwamba muundo wa serikali tatu utaudhofisha Muungano na kuelekea kuuvunja kabisa. Hoja nyingine ya kushangaza kabisa ni kwamba yawezekana Jeshi likachukua madaraka ikiwa serikali ya Muungano itakuwa haina vyanzo vya kuaminika kuweza kulitunza jeshi la wananchi! Maswali ambayo mtu mwenye kufikiri sawa sawa atajiuliza ni je: Mbona miaka yote CCM imeendesha uongozi wa chama chake kwa muundo ule ule wa serikali tatu? Ambao nimeueleza hapo juu? Mbona hatujasikia CCM ikilalamika kuendesha muundo huo kwa gharama kubwa? Au ni kwa vile chama kina fedha nyingi na rasilimali nyingi ambazo zilitaifishwa na kumilikiwa kinyemela? Mbona hatujasikia wala kushuhudia umoja ndani ya CCM unadhoofika kwa kufuata mfumo wa utatu? Mbona hatujasikia jeshi letu likilalamika pamoja na ukweli wa Taifa kupitia vipindi vigumu kiuchumi? Kama kweli CCM wana nia njema na Tanzania, kama wanapenda umoja na kudumisha Muungano, waache unafiki wao, waache ubinafsi, waache maslahi binafsi, watufundishe jinsi walivyofanikiwa kukiendesha chama chao kwa mfumo wa utatu bila kuvunja umoja wao. Watufundishe jinsi walivyofanikiwa kuwa na CCM Zanzibar, CCM Bara na CCM Taifa bila chama hicho kusambaratika. Hakuna haja ya kutoa mifano ya nchi zilizojaribu kutengeneza muungano wa serikali tatu zikashindwa wakati tuna mfano mzuri wa chama cha siasa kinachoendesha muundo huo kwa mafanikio makubwa. Source: Raiamwema.Toleo la 352 Soma zaidi kuhusu: ..- See more at: Raia Mwema - CCM ni waumini wa serikali tatu

Thread starter Mzee wa Usafi
Start date May 18, 2014

Mzee wa Usafi

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

CCM ni waumini wa serikali tatu

Mzee wa Usafi

JF-Expert Member

Our Community

Regional Communities