Kura ya Hapana itawezakana kweli?

kbm · 2014-11-02T17:45:41+00:00

KOSA jingine ambalo linakwenda kufanywa na wapinzani na watu wengine ambao walikubali mchakato wa Katiba mpya kufanyika hadi mwisho ni kuwa wanataka kujiandaa kufanya kampeni ya kura ya "Hapana". Siku chache zijazo itatangazwa tarehe ya kura ya maoni pamoja na swali ambalo Watanzania watatakiwa kulipigia kura hiyo. Kutoka hapo wale ambao wameonekana kukubali Katiba Inayopendekezwa watapita na kuendelea kuwashawishi watu wakubali Katiba Inayopendekezwa ili hatimaye ndiyo iwe Katiba mpya ya Tanzania. Kibarua cha wanaotaka kura ya "Hapana" ni kigumu zaidi kuliko watu wanavyoweza kufikiria. Ni kigumu kwa sababu kubwa mbili. Ya kwanza ni kama ile iliyotokea kwenye Bunge la Katiba ambamo tuliona jinsi gani Chama cha Mapinduzi (CCM) na wajumbe wenye mrengo wa ki CCM walivyoweza kuteka, na hatimaye kuongoza mjadala mzima wa Katiba mpya. Tuliona jinsi ambavyo CCM wakitumia Bunge la Muungano walivyopitisha Sheria ya Mabadiliko ya Katiba ambayo ilitengeneza mazingira ya wao kuwa ndio wadau wakuu wa mjadala wa Katiba mpya. Tuliona jinsi Sheria ile ilivyowafanya wana CCM kuwa na wingi wa zaidi ya asilimia 80 kwenye Bunge la Katiba, wingi ambao uliwafanya wawe ndio waamuzi wa nani anakuwa Mwenyekiti; nani anakuwa Makamu, Wenyeviti wa Kamati mbalimbali n.k. Matokeo ya Sheria ile yalionyesha mara moja – na wengine tulionya juu ya hili – jinsi gani Bunge hilo lingetawaliwa na UCCM dhidi ya Upinzani. Hili ni jambo ambalo litaweza kutokea tena kabla ya kura ya maoni. Tukumbuke kuwa tayari tunajua msimamo wa Serikali na wa CCM. CCM ndicho kinachounda Serikali na ndicho ambacho kinatoa mwongozo wa kisiasa nchini. Endapo CCM itaamua – na ninaamini itakuwa hivyo – kuweka mayai yake yote kwenye kikapu cha Kura ya Ndiyo sijui itakuwa ni kwa namna gani wenye kura ya "hapana" wataweza kushinda. Rais Jakaya Kikwete ameshakabidhiwa Katiba Inayopendekezwa na alitumia nafasi hiyo kuanza kuinadi Katiba hiyo bila watu wengine kupewa nafasi hata ya dakika chache kupinga na hivyo kama ingekuwa ni mechi basi wakati wachezaji wengine wanakuja kati kuanza dimba yeye mwenzetu kashafika golini na kufunga goli la kwanza – na likahesabiwa! Ni wazi kuwa mtu mwenye maslahi (stake) kubwa zaidi katika mchakato huu si CCM kama chama, bali ni Kikwete kama Rais. Ni yeye aliyeanzisha mchakato huu na ndiye yeye ambaye mchakato mzima umemzunguka. Ana hamu ya kuona kuwa historia itamkumbuka kwa kuiachia Tanzania Katiba mpya na hivyo sioni ni kwa vipi anaweza kuishi na kutambua kuwa juhudi zake zimekataliwa kwa kura ya hapana. Hii ndiyo sababu kubwa yay eye kuhakikisha kuwa anatumika vizuri kulainisha wapinzani pale ambapo mchakato ulijikuta unakwama kwama kiasi hata cha kuwazunguka. Tumeshuhudia baadhi ya wapinzani waking'aka ati Kikwete amegeuka makubaliano yao – ambayo hayapo kimaandishi – ya kuahirisha upigaji wa kura ya maoni. Tuliona alivyowazunguka kwenye mjadala mzima toka mwanzo pale ambapo alitetea nafasi yake kama Rais kusimamia mchakato huo. Ukweli huu unamfanya yeye kuwa ndiye mdau mkuu wa mchakato na hivyo kutokana na nafasi yake akiongoza Baraza la Mawaziri ambalo mawaziri wake wote walikuwa ni wajumbe wa Bunge la Katiba kuona kuwa kura ya "ndiyo" inapita tena kwa kishindo. Jambo la pili ambalo litafanya kura ya "hapana" kuwa ngumu zaidi ni kuwa Sheria ile mbaya waliyoipitisha na ambayo itakuwa mtego kwenye kura ya maoni ni matakwa kwamba ili Katiba mpya ipite ni lazima ikubaliwe na zaidi ya asilimia 50 ya wapiga kura wa Bara na zaidi ya asilimia 50 ya wapiga kura wa Zanzibar. Sasa hili wengine tuliliona mapema kama njia ya kijanja ya kupitisha Katiba mpya. Ikumbukwe kuwa kufanyia mabadiliko Katiba ya sasa kwenye Bunge la Muungano na kwenye Baraza la Wawakilishi inahitajika theluthi mbili tu ya wapiga kura yaani sawa na asilimia 66 hivi. Kimsingi kutaka theluthi mbili ikubali ni kulazimisha watu wazungumze, wajadaliane na kukubaliana. Sote tunajua jinsi ilivyo ngumu kupata asilimia 66 Zanzibar kwani katika historia ya miaka 50 iliyopita hakuna chama Zanzibar ambacho kimewahi kushinda kura kwa asilimia karibu na hizo! Kwa upande wa Tanzania Bara tunajua kuwa uchaguzi wa 2010 uliwatetemesha sana CCM kwani yule kiongozi mpendwa aliyekuja akiwa na ari mpya, kasi na nguvu mpya na ambaye alikopita watu walipiga kelele za furaha alipoteza umaarufu wake. Alipoingia mara ya kwanza Rais Kikwete alishinda kwa zaidi ya asilimia 80 ya wapiga kura lakini miaka mitano baadaye huku Serikali yake ikigubikwa na kashfa mbalimbali alijikuta anashinda kwa zaidi kidogo tu ya asilimia 60 (asilimia 62.83). Yaani kama ingekuwa ni kigezo cha theluthi mbili, Kikwete hakufikia. Sasa kama mtu maarufu kama Kikwete akiwa na Serikali yote mgongoni na akizunguka na kubebwa na vyombo mbalimbali vya habari hakuweza kufikia asilimia 66 – hii ni pamoja na zile tuhuma za kuchakachua; basi Katiba mpya itapata kibarua kigumu zaidi kama tungesema ili Katiba mpya ipitishwe angalau asilimia 66 (theluthi mbili) ya wapiga Kura wa Zanzibar na Bara wakubali. Sasa, kwa kufanya asilimia hiyo kuwa ya chini hivyo (bare minimum) ni wazi kuwa lengo ni kuhakikisha kuwa juhudi zote zinafanyika ili hata kama ni asilimia 52 Tanzania Bara au asilimia 50.01 Zanzibar zipatikane. Kwa kukubali mfumo huo wapinzania na wengine ambao wanafikiria wanaweza kuendesha kampeni ya "hapana" kwa mafanikio wamejinasa kwenye mtego hatari wa CCM. Ni wazi basi kuwa kama kuna kitu kingine cha kufanya kuzuia kupita kwa Katiba hiyo haiwezekani kuwa "kura ya hapana" kwani ugumu wake hapo ni mkubwa zaidi kuliko tunavyoweza kudhania. Kama wameweza kupitisha kwa mbinde na kwa upinde rasimu yao licha ya upinzani mkali na hata kugomewa, je, watashindwa kweli kupata ‘angalau' asilimia 50 pande zote za Muungano? Tukumbuke kuwa kama watashindwa kupata asilimia hizo na hivyo Katiba kushindwa kupita maana yake ni kuwa CCM watakuwa tayari kung'olewa mwakani kwani Watanzania watakuwa wameanza kuwasaidia kufungasha virago vyao. Lakini kama watapata zaidi ya kura hizo – iwe Bara au Visiwani – ni wazi kuwa CCM watakuwa na haki ya kutamba si tu kukubalika lakini kukubalika kiasi cha kuweza kupitisha Katiba wanayoitaka wao kwa Tanzania nzima kwa miaka mingi ijayo. Wakifanya hivyo; ni wazi kuwa watakuwa wamejitengenezea mazingira makubwa zaidi ya kushinda Uchaguzi Mkuu ujao kuliko tunavyoweza kuhofia. Je, kuna namna ya kuzuia Katiba mpya isipitishwe kwa asilimia hizo 50 na chini ya mabingwa wa siasa za mikakati (iwe ya halali au isiyo halali)? Je, wapinzani wanaweza kweli kuzuia kura hiyo isipite hasa baada ya kuingizwa mkenge tokea walipojipanga mstari kuingia uwanjani? Historia itahukumu. CHANZO: Raia Mwema

Thread starter kbm
Start date Nov 2, 2014

kbm

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

Kura ya Hapana itawezakana kweli?

kbm

JF-Expert Member

Our Community

Regional Communities