Ujumbe mkuu kwa CCM na watanzania wote

Mwiba · 2014-08-31T12:01:16+00:00

CCM ni Chama kibaya sana sana na ubaya wao ni wa kuivuruga Nchi. Soma kwa makini na tafakari ni jinsi gani uzembe wa CCM unaweza kupigwa vita kwa pamoja ,wasiachiwe kabisa wafanye watakavyo ,wasiachwe wakagawana hii Nchi. CCM (Chama Cha Mapinduzi) wataweza kuwagandamiza watu lakini ugandamizaji huo hautodumu. Utakuwa wa muda tu. Umma unaweza tu ukayakubali matakwa yao kwa kushawishiwa lakini si kwa njia za mabavu, za watawala kujifanyia watakavyo. Wananchi wengi wanataka mageuzi, wanataka mfumo uliopo ugeuzwe, ufisadi wa kila aina uangamizwe. Wanataka mageuzi hayo yapatikane kwa njia za amani, katika hali ambazo hazitoyatatiza maisha yao ya kila siku. Inavyoonyesha ni kwamba watawala wetu wana nia nyingine. Kwa mwendo huu walionao inaonyesha kama wanachotaka ni kuyakorofesha mambo ili pakosekane amani. Wanaamini kwamba hapo ndipo watapopata mwanya wa kuendelea kutawala. Na ni wazi kwamba Rais wa taifa hili sio tu kwamba si msikizi na haambiliki lakini lililo baya zaidi, akhasi ya yote, ni kwamba hataki kuyakubali majaaliwa yake.Hataki kukubali kwamba kwa hali ilivyo nchini anapaswa ajitolee mhanga kwa makosa aliyoyafanya alipolifungua rasmi Bunge Maalum la Katiba na awaachie wananchi wajiamulie mustakbali wao ili wayapate matilaba yao kwa njia za amani. Bila ya shaka hatuwezi kutabiri kwa uhakika mkondo wa mambo utakuwa vipi. Wala hatuwezi kutabiri kutatokea nini mchakato wa Katiba ukihitimishwa kwa njia zilizo potovu. Lakini kuna mengi tunayoweza kujifunza kutokana na yaliyopita katika nchi nyingine. Masomo ya historia ni mengi na vivuli vya historia ni vingi.Vivuli hivyo vinawaandama watawala wetu bila ya wenyewe kujuwa.Ndio maana mshipa hauwapigi.Kwa hakika, wamewasha cheche chungu nzima; moja tu likikolea moto ukazagaa taifa hili halitokalika. Hivi watendavyo watawala wetu wanacheza na majaaliwa si ya Tanzania ya leo tu bali ya vizazi vijavyo vya Tanganyika na Zanzibar. Wanaangalia mambo juujuu tena wanayaangalia kwa jicho la ubinafsi;jinsi mambo yatavyowanufaisha wao. Wanalisahau taifa. Wanasahau, kwa mfano, kwamba Katiba ni chombo pekee chenye kutegemewa na wananchi. Ni chombo kinachowahakikishia haki zao za kimsingi na uhuru wa aina mbali mbali. Ndio maana wananchi wanashikilia ipatikane Katiba mpya itayowaridhisha wengi wao. Wanataka Katiba ya kidemokrasia itayojikita juu ya kanuni za kisheria zinazotambulika duniani kote. Viongozi wetu wanawajibika wawe wasikizi wenye kukisikiliza kilio cha wananchi. Sio hivi wafanyavyo. Mbegu za yanayojiri siku hizi zimepandwa zamani katika mfumo wa kisiasa unaokataa mageuzi. Siku hizi hizo mbegu zinaanza kumea. Matokeo yake yatakuwa ya hatari. Wananchi wa tabaka zote wamechoka na mfumo uliopo. Wamekasirika na wamefadhaika. Katika nchi zisizo na mfumo wa kidemokrasia fadhaa aina hiyo mara nyingi husababisha machafuko katika jamii, hata mapinduzi. Katika miaka ya karibuni tumeyashuhudia hayo Tunisia, Misri, Libya na Yemen. Hivi kweli watawala wetu hawatambui kwamba wananchi wamechoka nao? Kwa nini wanashindwa kufahamu kwamba wanahatarisha amani kwa kuzishikilia sera zinazopingwa na wengi wa wananchi, kwa mfano ile ya kushikilia kwamba Muungano lazima uwe wa serikali mbili? Kwa nini watawala wetu wakawa na ukaidi wa kukataa kufumbua macho ili waone yale ambayo sote tunayaona? Kwa nini hawatambui kwamba wanaweza wakakumbwa na vuguvugu la umma la kupigania haki? Likianza litawapiga kama kimbunga wasijue kilianzia wapi na kitaishia wapi. Kuna siku mivutano yote hii iliyopo kuhusu mchakato wa Katiba itakwisha. Hata manunguniko kuhusu utawala mbovu huenda yakapungua baada ya kupatikana kwa uongozi mbadala na huu tulio nao sasa. Swali la kujiuliza ni je, hali hiyo itapatikana kwa njia gani? Itapatikana kwa njia za hekima, usalama na amani kama wengi wetu tunavyoomba au kwa njia nyinginezo? Wataoamua ni watawala. Wasisahau tu kwamba ni nadra kumbukumbu za umma kufifia. Kawaida ya umma ni kukumbuka. Daima wananchi hukumbuka wanayotendewa na watawala. Wakati mwingine umma huwasamehe watawala kwa maovu waliyoyatenda. Wakati mwingine umma nao unakuwa hauambiliki. Huingia wazimu wa kuwachukulia hatua watawala waliokosa, wanaovipuuza vivuli vya historia.

Thread starter Mwiba
Start date Aug 31, 2014

Mwiba

JamiiForums uses cookies to help personalise content, tailor your experience and to keep you logged in if you register.
By continuing to use this site, you are consenting to our use of cookies.

Accept Learn more…

Back

Top Bottom

Forums

New posts

Ujumbe mkuu kwa CCM na watanzania wote

Mwiba

JF-Expert Member

Our Community

Regional Communities